Við bjóðum ykkur foreldra/forráðamenn og barnið ykkar velkomin í ungbarnaleikskólann Ársól.

Dvalarsamningur
Allir foreldrar skrifa undir dvalarsamning þegar barnið byrjar leikskólagöngu sína og biðjum við foreldra um að kynna sér ákvæði hans vel. Í honum er m.a. að finna upplýsingar um dvalartíma barnsins. Við viljum biðja foreldra um að fara ekki fram yfir þann tíma sem samið hefur verið um. Vinnutími starfsmanna er skipulagður með tilliti til dvalarsamninganna.

Áætlun fyrir aðlögun
Fyrsti dagur:
Barnið kemur kl. 9:00 og er fram yfir hádegismat. Foreldri er með allan tímann, sér um barnið sitt og tekur þátt í öllu starfi í góðri samvinnu við starfsfólk.

Annar dagur:
Barnið kemur klukkan 8:30 (ef barn er ekki í áskrift af morgunmat þá mætir það kl. 9:00 eins og fyrsta daginn ) og er fram yfir hvíldina. Foreldri er með allan tímann, sér um barnið sitt og tekur þátt í öllu starfi í góðri samvinnu við starfsfólk.

Þriðji dagur:
Barnið kemur á umsömdum vistunartíma og er fram yfir nónhressingu (til kl. 15:00). Foreldri er með allan tímann, sér um barnið sitt og tekur þátt í öllu starfi í góðri samvinnu við starfsfólk.

Foreldrar eru inni á deild með börnum sínum allan tímann ( nema þegar þau sofa). Foreldrar sinna börnum sínum, skipta á þeim, gefa þeim að borða, leika með þeim og eru til staðar. Kennararnir eru virkir þátttakendur í aðlöguninni, þeir skipuleggja daginn og útdeila verkefnum. Vinsamlegast takmarkið símanotkun á meðan á aðlögun stendur.


Á fjórða degi koma börnin á sínum tíma um morguninn og kveðja foreldrana fljótlega. Einstaka börn þurfa að hafa foreldra sína með sér í fjóra daga en reynslan sýnir að þau eru fá.

Mikilvægt er að minna á trúnað og þagnarskyldu þar sem ljóst er að með lengri viðveru tímabundið fá foreldrar óbeinar upplýsingar um önnur börn.

Þetta er einungis áætlun um það hvernig aðlögunin fer fram. Það er mjög mikilvægt að aðlögunin fari fram eftir þörfum barnsins og því gætu tímasetningar breyst og viðvera foreldra verið meiri en gert er ráð fyrir í áætluninni. Einnig er mikilvægt að hægt sé að ná í foreldri í síma þegar farið er úr húsinu á aðlögunartímabili.

Að koma og fara
Þegar barnið kemur í leikskólann á að fylgja því inn á sína leikstofu og afhenda starfsmanni og þegar barnið er sótt er mikilvægt að láta starfsmenn vita. Mjög mikilvægt er að foreldrar kveðji barnið. Upplýsingatöflur í fataherbergjum leikskólans eru ætlaðar til að koma upplýsingum á framfæri við foreldra/forráðamenn. Fylgist vel með upplýsingatöflunni.

Klæðnaður / Aukaföt
Mikilvægt er að klæðnaður barnanna sé þægilegur þannig að hann hefti ekki leikgleði þeirra. Klæðið börnin eftir veðri en hafið það ætíð hugfast að börn hreyfa sig mikið við leik úti og geta því svitnað ef þau eru mikið klædd. Nauðsynlegt er að barnið hafi með sér aukafatnað og mikilvægt er að merkja fatnaðinn. Í leikskólanum vinnum við með ýmis efni s.s. lím og málningu sem geta farið í föt barnanna þó svo starfsfólk leiti allra leiða til að svo verði ekki. Vinsamlegast takið tillit til þess og klæðið börnin við hæfi. Fötin eru ekki tryggð fyrir þessu.

Merkja eigur barnanna
Mikilvægt er að merkja allar eigur barnanna, bæði skó, föt og snuð til þess að koma í veg fyrir að eigurnar fari í röng hólf og rétt snuð rati í rétta munna. Það er hægt að panta merkingar á fatnað og skó á www.rogn.is, www.merkt.is og fyrir snuð á www.navnesutten.dk og www.mambaby.com

Það sem þarf að vera til staðar í leikskólanum
3 samfellur
2 sokkabuxur
Langermabolur
Síðbuxur
Þunn húfa
Föt til að sofa í
Inniskór
Snuð

Regnföt
Kuldagalli
Tvenn pör af vettlingum
Ullarsokkar
Þykk húfa
Skór eða stígvél
Sokkar

Auka stútkanna/vatnsbrúsi fyrir vatnsdrykkju yfir daginn

Taupoki fyrir óhrein föt

Koma með myndir fyrir fjölskylduvegginn

Tæma töskur og hólf
Það eru mörg börn sem nota fataherbergin og til þess að allir hafi nægilegt pláss er nauðsynlegt að tæma töskur á mánudögum og setja föt barnsins í hólfið. Hvert barn á sinn snaga fyrir útifötin í fataherbergi og sitt box undir aukaföt inn á deild. Það er því óþarfi að geyma töskurnar í leikskólanum.
Á föstudögum eru útiföt tekin heim þannig að engin föt séu á snögunum eða í bláu körfunum svo hægt sé að þrífa vel hillurnar í fataherbergjunum. Aukaföt mega vera í leikskólanum, en vinsamlegast yfirfarið boxin reglulega.

Vagnar
Það er í boði að geyma vagnana í leikskólanum á virkum dögum en það þarf að taka alla vagna heim um helgar svo hægt sé að þrífa vel hjá okkur. Þeir vagnar sem eru skildir eftir í lok vikunnar verða hafðir úti og eru ekki á ábyrgð leikskólans. Gott er að hafa vagnana merkta.

Bleyjur
Boðið er upp á bleyjur í Ársól gegn vægu gjaldi, kr.2,200 á mánuði. Foreldrum er að sjálfsögðu frjálst að koma með bleyjur að heiman og fá þau börn merkt hillupláss fyrir bleyjurnar inni á deild. Nauðsynlegt er að hafa alltaf nóg af bleyjum til staðar. Þegar það vantar bleyjur er settur miði á hólf barnsins eða skilaboð send til foreldra í gegnum Karellen appið en foreldrar geta einnig fylgst sjálfir með bleyjumálum með því að kíkja í hillurnar inni á deild.

Hvíld
Öll börnin leggja sig eftir hádegismatinn. Þau sem sofa inni taka með sér teppi, kodda og jafnvel lítinn bangsa að heiman til að hafa hjá sér í hvíldinni. Það að koma með sitt eigið teppi veitir þeim öryggi og auðveldar þeim að venjast því að leggja sig í leikskólanum. Gott er að hafa lítið og létt teppi svo öll börnin hafi nægilegt pláss í hvíldinni. Í lok vikunnar eru koddarnir og teppin send heim með börnunum svo hægt sé að þvo þau.
Þau börn sem nota snuð í hvíldinni koma með þau í leikskólann og geyma þau þar.

Óhöpp og slys
Börnin eru tryggð í leikskólanum. Einn starfsmanna er öryggisfulltrúi leikskólans, sem hefur yfirumsjón með öryggismálum barnanna. Ef slys eða óhöpp verða eru þau skráð í slysaskýrslur, sem eru síðan notaðar til að athuga hvort slysagildrur eru í leikskólanum eða á leiksvæðinu. Ef barn slasast er haft samband við foreldra og þau sjá um að fara með barn til læknis ef þörf er á. Ef um alvarlegt slys er að ræða er alltaf hringt á sjúkrabíl og svo haft samband við foreldra.

Sumarlokun
Öll börnin taka 4 vikur samfleytt í sumarfrí. Leikskólinn er lokaður í 4 vikur og lokunartími Ársólar verður vel auglýstur seinna.

Foreldrasamstarf
Gott samstarf foreldra og leikskóla er forsenda fyrir góðri líðan barnsins í leikskólanum. Samvinna foreldra og leikskóla þarf að byggjast á gagnkvæmri virðingu og opnum samskiptum. Foreldrum er ávallt velkomið að dvelja í leikskólanum og taka þátt í starfinu. Foreldraviðtöl eru tvisvar á ári. Fyrsta viðtal er ca. þremur mánuðum eftir að barn byrjar í leikskólanum og þá er farið yfir hvernig ykkur og okkur finnst ganga í skólanum. Seinna viðtalið er á vorönn og þá er farið í þroskaþætti barnsins. Það er sjálfsagt að biðja um viðtal hvenær sem er og þá er best að hafa samband við deildarstjóra til að finna tíma fyrir viðtalið.

Samkvæmt leikskólalögum á að vera foreldraráð í hverjum leikskóla og í foreldráði sitja að lágmarki þrír foreldrar ásamt leikskólastjóra. Hlutverk foreldraráðs er að gefa umsagnir til leikskóla um skólanámskrá og aðrar áætlanir sem varða starfsemi leikskólans. Þá skal ráðið fylgjast með framkvæmd skólanámskrár og annarra áætlana innan leikskólans og kynningu þeirra fyrir foreldrum. Foreldraráð hefur umsagnarrétt um allar meiri háttar breytingar á leikskólastarfi. Á skólaárinu 2016-2017 sitja þrír foreldrar í foreldraráði ásamt leikskólastjóra.

Afmæli barnanna
Afmælisdagar barnanna eru stórir dagar í lífi þeirra og er að sjálfsögðu haldið upp á hann í leikskólanum. Barnið fær kórónu og sunginn er afmælissöngurinn. Einnig fær barnið að borða úr sérstökum diski. Við sjáum um að gera daginn sérstakan fyrir barnið með ýmsum hætti en ekki er boðið upp á að koma með veitingar í leikskólann.

Skipulags– og námskeiðsdagar
Starfsdagar eru 6 á ári. Þá notar starfsfólk til að skipuleggja, undirbúa og endurmeta starf sitt. Leikskólinn er lokaður á þessum dögum og eru þeir auglýstir með a.m.k. 4 vikna fyrirvara á heimasíðunni og með tölvupósti til foreldra.

Flutningur á milli leikskóla
Þegar börn komast inn í Ársól detta þau út af biðlista hjá Reykjavíkurborg. Mikilvægt er að sækja um flutning sem fyrst svo þau séu áfram á lista hjá borginni. Þetta er hægt að gera inn á Rafrænni Reykjavík.

Dvalargjöldin
Gjöldin eru greidd fyrirfram, greitt er fyrir einn mánuð í senn og gjald lækkar ekki þó barn sé fjarverandi. Skuldi foreldrar tvo mánuði er barninu sagt upp leikskólarýminu.
Gagnkvæmur uppsagnafrestur er einn mánuður og miðast við 1. og 15. hvers mánaðar. Hægt er að sækja um breytingar á vistunartímum hjá skólastjóra fyrir 15. hvers mánaðar.

Aukagjald er innheimt þegar barn er sótt of seint eða kemur of snemma þ.e. 200kr frir hvern byrjaðan stundarfjórðung en 400kr ef kennarar hafa ekki verið látnir vita af seinkuninni. Ef barn er sótt eftir lokun skóla greiðist 1600kr aukagjald fyrir hvern byrjaðan stundarfjórðung.

Starfsfólk Leikskóla
Leikskólastjóri er yfirmaður leikskóla og ber ábyrgð á rekstri leikskólans og að unnið sé eftir Aðalnámskrá leikskóla og skólanámskrá heilsuleikskólans Háaleitis.
Deildarstjóri ber ábyrgð á uppeldi og menntun barnahópsins á sinni deild. Hann ber einnig ábyrgð á foreldrasamstarfi á deildinni.
Kennarar vinna í samstarfi við deildarstjóra að uppeldi og menntun barnanna.
Fagstjórar sjá um skipulagningu og kennslu í hreyfingu og listsköpum.
Matráður og starfsfólk í eldhúsi sjá um samsetningu matseðla, innkaup, matartilbúning og þvotta.
Ræstitæknar sjá um þrif.

Allt starfsfólk leikskólans er bundið þagnarskyldu og þær upplýsingar sem starfsmaður fær um barnið eru trúnaðarmál.
Þagnarskylda helst þó látið sé af starfi.

© 2016 - Karellen